اسلام آباد۔20اگست(اے پی پی)وزیراعظم محمد شہباز شریف چین دیاں صنعتاں کوں پاکستان اچ سرمایہ کاری دی دعوت ݙیندے آکھیے جو حکومت خصوصی اقتصادی زونز دے قیام کیتے ہر ممکن سہولتاں ݙیسی۔ اے ڳالھ انہاں چینی کمپنی شینڈونگ زن زو گروپ کارپوریشن دے وفد نال گالھ مہاڑ اچ آکھی جئیں بدھ کوں اسلام آباد اچ انہاں نال ملاقات کیتی۔ وفد دی قیادت شینڈونگ زن زو گروپ دے چیئرمین ہیو جیانزن کریندے پئے ہن۔ وفد نال الیندے وزیراعظم آکھیا جو ݙوہیں ملک ہر اوکھ اچ ہک ݙوجھے دے نال کھڑے رہن۔ انہاں چینی صنعتاں کوں پاکستان اچ سرمایہ کاری دی دعوت ݙتی اتے آکھیا جو حکومت خصوصی اقتصادی زونز دے قیام کیتے ہر ممکن سہولتاں فراہم کریسی۔ وزیراعظم کوں ݙسایا ڳیا جو پاکستان دے شپ بریکنگ اتے شپ ری سائیکلنگ دے شعبیاں اچ ودھ گنجائش موجود اے۔ چینی کمپنی شینڈونگ دے چیئرمین حکومت پاکستان ولوں سہولتاں ݙیوݨ تے وزیراعظم دا شکریہ ادا کریندے آکھیا جو شینڈونگ پاکستان اچ میری ٹائم انڈسٹریل کمپلیکس دے قیام اچ دلچسپی رکھیندی اے، شینڈونگ پاکستان اچ گرین شپ بریکنگ یارڈ بݨیسی۔ انہاں آکھیا جو انہاں دی کمپنی ماہی گیری، فش اتے کھجوراں دی پراسیسنگ دے حوالے نال پاکستان دی گنجائش توں فائدہ چاوݨ چاہندی اے۔ ملاقات اچ وفاقی وزیر بحری امور جنید انوار چوہدری، وزیراعظم دے مشیر ڈاکٹر توقیر شاہ اتے متعلقہ سرکاری حکام وی موجود ہن۔
