اسلام آباد۔5ستمبر (اے پی پی) نائب وزیراعظم اتے وزیر خارجہ سینیٹر محمد اسحاق ڈار آزادی اتے فلسطینی ریاست دے قیام کیتے فلسطینی عوام دی منصفانہ جدوجہد دے نال پاکستان دی پکی یکجہتی دا اعادہ کیتے۔ دفتر خارجہ موجب انہاں اے گالھ جمے کوں اتھاں فلسطینی وفد نال گالھ مہاڑ کریندیں ہوئیں آکھی جئیں دی قیادت فلسطینی صدر دے مشیر اتے سپریم جج محمود الھباش کیتی۔ دفتر خارجہ آوݨ تے نائب وزیراعظم آکھیا جو انہاں کوں فلسطینی وفد دا استقبال کریندیں ہوئیں خوشی تھئی اے۔ انہاں آکھیا جو ملاقات اچ فلسطینی عوام دی آزادی، وقار اتے ریاست کیتے فلسطینی دی منصفانہ جدوجہد دے نال پکی یکجہتی دا اعادہ کیتا ڳیا۔ نائب وزیراعظم آکھیا جو ملاقات اچ جون 1967 توں پہلے دی سرحداں تے مبنی آزاد اتے خود مختار ریاست فلسطین کیتے مضبوط حمایت کوں ہک واری ولا دوہرایا ڳیا جئیں دا راڄگڑھ القدس الشریف اے۔ انہاں اسرائیلی جارحیت اتے جنگی جرائم، نسل کشی، فاقہ کشی، انسانی قحط، اجتماعی قتل، غیر قانونی وستیاں دے قیام، قبضہ اتے جبری نقل مکانی کوں سختی نال رد کریندیں ہوئیں ہک مستقل اتے غیر مشروط جنگ بندی، بے روک ٹوک انسانی امداد دی فراہمی اتے جوابدہی دا مطالبہ کیتا۔ نائب وزیراعظم سینیٹر محمد اسحاق ڈار آکھیا جو ملاقات اچ آپݨے فلسطینی بھراواں اتے ٻھیݨیں دی حمایت جاری رکھݨ دا وعدہ کیتے۔
