اسلام آباد۔ 24 ستمبر(اے پی پی)صدر مملکت آصف علی زرداری ڈیرہ اسماعیل خان دے علاقے درابن اچ دہشتگرداں دے خلاف کامیاب کارروائی تے قوم اتے سیکیورٹی فورسز کوں مبارکباد ݙتی اے۔ صدر مملکت آکھیے جو ساݙے جواناں دی بہادری اتے قربانیاں ملک دے ہر شہری کوں محفوظ بݨیدن۔ دہشتگردی دے خلاف اے جدوجہد پاکستان دے پرامن مستقبل دی ضمانت اے۔ انہاں آکھیا جو ریاست دی رِٹ قائم کرݨ کیتے ݙتی ونڄݨ والی ہر قربانی تاریخ اچ سوھݨے حروف نال لکھی ویسی۔ پاکستان دے عوام ہمیشہ اپݨے شہداء اتے غازیاں دے نال کھڑے تھی کے دہشتگردی کوں مسترد کیتے۔ صدر آصف علی زرداری آکھیا جو نوجوان نسل کوں انتہاپسندی توں بچاوݨ ساݙی اجتماعی ذمہ داری اے۔
