اسلام آباد۔ یکم اکتوبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیے پاکستان تے امریکا وچال توانائی، کان کنی تے ٹیکنالوجی دے شعبیں وچ تعاون کوں مزید ودھایا ویندا پئے تے امریکی سرمایہ کاراں کوں راغب کرݨ کیتے ایں مہینے دے چھیکڑ وچ واشنگٹن وچ ہک سرمایہ کاری کانفرنس منعقد کیتی ویندی پئی اے۔ انہاں اے ڳالھ بلوم برگ نیوز کوں انٹرویو وچ آکھی۔ وزیر خزانہ ݙسائے جو اساکوں ٻہوں واضح طور تے پتہ اے جو کیڑھے شعبیں وچ اساکوں امریکی سرمایہ کاری دی لوڑھ اے تے کیڑھے شعبیں وچ سرمایہ کاری دی حقیقی گنجائش اے تے امریکا دے نال رل تے اساں ایں ویلھے ایں عمل دا باقاعدہ آغاز کر ݙتے۔ وزیر خزانہ آکھیا اے پیش رفت امریکا دے نال تھیوݨ آلے نویں تجارتی معاہدے دے بعد سامݨے آئی اے جیندے تحت پاکستان تے صرف 19 فیصد ٹیرف لاتا ڳئے جیڑھا خطے دے ٻئے ملکاں توں گھٹ تے بھارت تے عائد امریکی ٹیرف دے مقابلے وچ ٻہوں گھٹ اے۔ ٹیرف دی ایں شرح پاکستان دی برآمدی مسابقت وچ اضافہ کیتے تے ملک کوں بحران توں نکلݨ وچ مدد ملی اے۔ وزیر خزانہ آکھیے جو پہلا کم تجارتی توازن کوں بہتر کرݨ ہئی، جیڑھا ہݨ تھی چُکے، میݙی نظر وچ پاکستان دی ہر صنعت کنے برآمدی جزو ہووݨاں چاہیدے کیوں جو ایہو واحد رستہ اے جیندے ذریعے اساں عروج و زوال دے چکر توں نکل سڳدوں۔ انہاں آکھیا جو بین الاقوامی مالیاتی فنڈ (آئی ایم ایف) دے جائزے وچ پاکستان دی پیش رفت زیادہ تر اہداف موجب اے، پاکستان منگل کوں واجب الادا 500 ملین ڈالر یورو بانڈ دی ادائیگی وی کر ݙتی اے۔
