لندن۔1جون(اے پی پی):وفاقی وزیرداخلہ محسن نقوی نیشنل کرائم ایجنسی ، فارن کامن ویلتھ اینڈ ڈویلپمنٹ آفس اتے کابینہ آفس نیشنل سیچوایشن سنٹر دا دورہ کیتے۔ وزیر داخلہ برطانیہ دے ترائے اہم اداریں دے تفصیلی دورے کیتے تے اعلیٰ حکام ملاقاتاں کیتن ۔ انھاں آکھیے نیشنل کرائم ایجنسی دے ڈائریکٹر جنرل جیمز بیبیج اتے فارن کامن ویلتھ اینڈ ڈویلپمنٹ آفس دے ڈائریکٹر جنرل نیشنل سکیورٹی جوناتھن ایلن نال ملاقاتاں کیتیاں ۔ وفاقی وزیرداخلہ محسن نقوی کوں برطانوی اداریں دے افعال کار بارے بریفنگ ݙتی ڳئی نیڑے تعاون تے اتفاق کیتا ڳئے ۔ وزارت داخلہ دی طرفوں جاری تفصیل موجب ایں موقع تے انسداد دہشت گردی ،منظم جرائم روکݨ تے سائبر سیکورٹی دے تناظر اچ معاونت تے ڳالھ مہاڑ کیتی ڳئی ۔ فریقین منشیات، سائبر کرائم اتےغیر قانونی امیگریشن روکݨ سانڳے اشتراک کار ودھاوݨ تے اتفاق کیتے۔ وزیر داخلہ آکھیے پاکستانی افسران کوں نیشنل کرائم ایجنسی توں سائبر کرائمز اتے انسداد منشیات دے حوالے نال تربیت ݙیوائی ویسی سائبر کرائمز دے چیلنج نال نبݨݨ سانڳے برطانیہ دے تعاون دا خیرمقدم کریسوں ۔ محسن نقوی آکھیے سائبر کرائمز کوں روکݨ تے سائبر سیکورٹی دے سلسلے اچ برطانیہ دا تعاون ٻہوں سود مند رہسی ،انسداد منشیات دے سلسلے اچ ݙوہیں ملکاں کوں مزید کوآرڈینیشن دے تحت کم کرݨ دی لوڑھ اے ۔ انہاں آکھیے پاکستانی قوم اتے افواج دہشتگردی دے خلاف جنگ اچ قربانیاں دی تاریخ رقم کیتی اے ،دہشتگردی دے چیلنج نال نبݨݨ سانڳے مشترکہ لائحہ عمل اپناوݨ دی لوڑھ اے ۔
