ارومچی۔ 19 ستمبر (اے پی پی) صدر مملکت آصف علی زرداری پاکستانی تے چینی کمپنیاں وچال مفاہمت دی یادداشتاں (ایم او یوز) تے دستخط دی تقریب اچ شرکت کیتی۔ ایوان صدر دے پریس ونگ توں جمعہ کوں جاری بیان دے مطابق پہلی مفاہمت دی یاداشت لیویانگ ماڈرن بائیو ٹیکنالوجی اینڈ حکومت سندھ وچال طے تھئی۔ صوبائی وزیر ناصر شاہ سندھ حکومت دی نمائندگی کیتی جیندا محور پاکستان دی لائیو سٹاک صنعت کوں جدید بݨاوݨ اے۔ ݙوجھی مفاہمت دی یاداشت بیجنگ اینر افریقہ لونگو تے اے ایس ایم سروسز دے درمیان طے تھئی، جو پاکستان اچ ہک جدید ٹیکسٹائل انڈسٹریل پارک دی تشہیر تے تعمیر بارے اے۔ تریجھی مفاہمت دی یاداشت سیچوان چوانکساؤ فائر ٹرکس مینوفیکچرنگ کمپنی تے اے ایس ایم سروسز وچال طے تھئی، جو پاکستان کیتے فائر ٹرکس تے جدید ایمرجنسی آلات دی فراہمی، تقسیم، فروخت تے بعد از فروخت خدمات اچ تعاون دا فریم ورک طے کریندی اے۔ تقریب توں خطاب کریندیں ہوئے صدر مملکت آصف علی زرداری آکھیا جو اے مفاہمت دی یادداشتاں پاکستان تے چین وچال انہاں شعبیاں اچ تعاون دے نویں دروازے کھولیسی جیہڑے براہ راست پاکستان دی معاشی ترقی تے عوامی بہبود کیتے معاون ہن۔ انہاں آکھیا جو لائیو سٹاک انڈسٹری کوں جدید بݨاوݨ نال خوراک دے تحفظ اچ بہتری آسی اتے دیہی علاقیاں اچ روزگار دے مواقع پیدا تھیسن، ٹیکسٹائل پارک توں صنعتی ترقی تے برآمدات کوں فروغ ملسی، جݙاں جو فائر ٹرکس تے ایمرجنسی آلات تے شراکت داری نال پاکستان دی آفات دے ردعمل تے کمیونٹی دے تحفظ دی صلاحیتاں مضبوط تھیسن۔ تقریب اچ سینیٹر سلیم مانڈوی والا، چین اچ پاکستان دے سفیر تے پاکستان اچ چین دے سفیر وی موجود ہن۔
