اسلام آباد۔16ستمبر (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) مظفر گڑھ کیتے 5000 خیمے سودھے پنجاب دے سیلاب توں متاثرہ علاقیں کیتے ٻئیا امدادی سامان ٻھیج ݙتے۔۔ منگل کوں این ڈی ایم اے ولوں جاری بیان دے مطابق وزیر اعظم دی خصوصی ہدایت تے این ڈی ایم اے دا سیلاب توں متاثر ہ علاقیں اچ امدادی آپریشن جاری اے۔ این ڈی ایم اے پنجاب دے سیلاب توں متاثرہ علاقیں کیلے ٻئے امدادی سامان روانہ کر ݙتا۔ این ڈی ایم اے ولوں پی ڈی ایم اے پنجاب کوں مظفر گڑھ دے سیلاب متاثرین کیتے ٻئے 5000 خیمے ݙتے ڳئن۔ این ڈی ایم اے ولوں سکھر توں 8 ٹرکاں دے ذریعے 1100 خیمے مظفر گڑھ کیتے روانہ کیتے ڳئن۔ جلوزئی توں وی 16 اتے 15 ٹرکاں تے مشتمل ݙو قافلیاں دے ذریعے 3900 خیمے مظفر گڑھ کیتے ٻھیجن۔ پنجاب کوں ھݨ تئیں ݙتے ڳئے 2215 ٹن امدادی سامان اچ کمبل، خیمے، مچھر دانیاں، پاݨی دے فلٹریشن پلانٹ، رضائیاں، فولڈنگ بیڈ، پاݨی دے کین سمیت 17 کشتیاں شامل ہن۔ این ڈی ایم اے ولوں پنجاب دے سیلاب متاثرین کیتے ھݨ تئیں 35000 خیمے ݙتے ڳئن۔ این ڈی ایم اے سارے متعلقہ سول اتے عسکری اداریاں نال مکمل رابطے اچ اے، این ڈی ایم اے سارے متعلقہ اداریاں ولوں جاری امدادی کارروائیاں کوں پوری توجہ نال ݙیکھدا پئے۔
.jpg)
