لاہور۔15 جون(اے پی پی )صوبائی وزیر خزانہ مخدوم ہاشم جواں بخت آکھیے جو حکومت پنجاب زراعت‘ آبپاشی ،ڈھورڈنگت، سماجی اتے سرکاری و نجی شعبیاں اچ ساجھے داری دے منصوبیاں دا پروگرام بنڑائے،بجٹ اچ محروم طبقیاں کیتے کئی وڈے پروگرام رکھیے گین جیندے اچ باہمت بزرگ پروگرام‘ ہم قدم پروگرام‘ پنجاب احساس پروگرام‘مساوات‘نئی زندگی پروگرام‘ خراج شہداءپروگرام‘ ہم قدم‘سرپرست پروگرام سودھے بئے پروگرام شامل ہین،آندے مالی سال دا بجٹ زمینی حقائق اتے مالی مشکلاں کوں ڈیہدے ہوئے بنڑایا گئے،سیف سٹی منصوبے بئے شہراں اچ وی بنڑسن،بالاں کوں سکول داخل کراونڑ کیتے انصاف سکول پروگرام آندا پئے، اورنج لائن ٹرین منصوبہ توں اشتہارات توں ملنڑ آلی آمدن نال سبسڈی ڈتی ویسی۔اے گالھ انہاں ایوان وزیر اعلیٰ لاہور اچ پوسٹ بجٹ پریس کانفرنس نال خطاب اچ آکھی۔انہاں آکھیے جو پنجاب حکومت کفایت شعاری دے تحت تفریحی اخراجات اچ 60 فیصد تئیں بچت کیتی اے جیکر وسائل گھٹ ہوون تاں جدت اپناونڑی پوندی اے۔صوبائی وزیر خزانہ آکھیا جو معاشی بحران توں نکلنڑ دی کوشش اے،ملک کوں بئے قرضیاں وات نہ کریسوں کیوں جو ملک پہلے ہی سابق حکومتاں دیاں غلط پالیسیاں پاروں اوکھا اے ایں سانگے شارٹ دی بجائے لانگ ٹرم پالیسیاں نال ترقی تے زور ڈتا ویندا پئے،عوام کوں ودھ توں ودھ سوکھ ڈتا ویسی۔انہاںا ٓکھیے جو سکیورٹی اداریاں دے حقوق دے تحفظ کیتے پیکیج وی ریوائز کیتا ویندا پئے،ہنڑ ارب دے نال نال دیہی اتے دور پار علاقیاں کوں وی ترقی اچ رلیسوں اتے ودھ توجہ ڈیتی ویسی۔انہاںا ٓکھیے جو پروفیشنل ٹیکس دا مقصد افراد کوں ٹیکس نیٹ اچ رجسٹرڈ کرنڑ اے۔ انہاں آکھیے جو سرکاری ملازمین اتے پنشن اچ ڈاہ فیصد ودھارا کیتا گئے، جڈاں جو کابینہ دیاں تنخواہیں ہتھو 10 فیصد گھٹاڈتیاں گین۔
