اسلام آباد۔29جون (اے پی پی):وفاقی وزیر خزانہ شوکت ترین آکھیے جو 74سال اچ پہلی واری غریب عوام دی فلاح و بہبود اتے ترقی و خوشحالی دا روڈ میپ ݙتا ڳئے ایندی ماضی اچ مثال نی ملدی ، ٹیکس چوراں دے خلاف کارروائی کیتے انکم ٹیکس ایکٹ دی شق 203اچ اصلاحات گھن آئیاں ڳئن جیں دے ذریعے ٹیکس چوراں کوں گرفتار کریسوں ، جݙاں تئیں ٹیکس ٹو جی ڈی پی دی شرح 20 فیصد تئیں نہ گھن آسوں صورتحال بہتر نہ تھیسی، ملکی تاریخ اچ پہلی واری زراعت دے شعبے کیتے وفاقی حکومت 62 ارب روپے دا بجٹ رکھیے ، ایندے توں انڄ کھاداں تے وی سبسڈی ݙتی ویسی ،کوئی نواں ٹیکس نی لاتا ڳیا ، تاجر صارفین توں جیڑھے سیلز ٹیکس وصول کریندن اساں انہاں توں او سیلز ٹیکس وصول کریسوں۔ منگل کوں قومی اسمبلی اچ مالی ٻل 22۔ 2021 تے پہلی خواندگی دے موقع تے بحث کوں سنبھیندے ہوئیں وفاقی وزیر خزانہ شوکت ترین آکھیے جو انہاں کوں توقع ہئی جو اڄ مالیاتی ٻل اچ ترامیم تے بحث تھیسی مگر ایندی بجائے اساکوں تقریراں ݙیکھݨ کوں ملیاں ۔ 74 سالہ تاریخ اچ پہلی واری پاکستان اچ غریب عوام دی فلاح و بہبود اتے ترقی و خوشحالی کیتے روڈ میپ ݙتا ڳئے ۔ جݙاں جو 40 لکھ لوکاں کوں گھر ملسن ، زراعت اتے کاروبار کیتے سود توں پاک قرضے ملسن تاں ایندے نال ملک اچ خوشحالی آسی تے اپوزیشن فارغ تھی ویسی ۔ انہاں آکھیے جو روٹی، کپڑا اتے مکان دے نعرے ماضی اچ لاتے ڳئے ہن ، موجودہ حکومت ایں تے عمل کیتے۔ بجٹ اچ جیڑھے اہداف ݙتے ڳئن انہاں کوں پورا کرتے ݙکھیسوں ۔ مہانگ دا ذکر کریندے ہوئیں وزیر خزانہ آکھیے جو ایں ویلھے بنیادی افراط زر 7 فیصد دی سطح تے ہے جیڑھا جو انہاں دے دور حکومت اچ وی ہئی ۔غذائی افراط زر اچ ودھارا تھئے ، ایندی بنیادی وجہ اے ہے جو ماضی اچ زراعت تے پیسے خرچ نی کیتے ڳئے ۔ زراعت اچ سرمایہ کاری نہ تھیوݨ پاروں اساں کھنڈ ، کݨک ، دالاں تے ٻئیاں غذائی چیزاں دی درآمد تے زرمبادلہ صرف کریندے پیوں ۔ ایں ویلھے بین الاقوامی مارکیٹ اچ غذائی چیزاں دیاں قیمتاں ݙاہ سال دی اتلی سطح تے ہن ، ایں صورت حال نال نبݨݨ کیتے اساں آپݨی زراعت اتے زرعی پیداوار کوں ترقی ݙیوݨی اے ۔ وزیر خزانہ آکھیے جو اساں عام لوکاں دے معیار زندگی کوں چنڳاں کرݨ سانگے ٹرکل ڈائون تے انحصار نہ کریسوں ۔ چالیھ لکھ گھراں دی آمدنی اچ ودھارا کیتا ویسی جیں دے نتیجے اچ غربت گھٹ تھیسی اتے چار توں پنج سالاں اچ خوشحالی ہوسی۔ انہاں آکھیے اپوزیشن ارکان ولوں آئی ایم ایف دا ذکر کیتا ڳئے جݙاں 20 ارب ڈالر دا خسارہ ورثے اچ ملیا تاں آئی ایم ایف ݙے ونڄݨا پیا ۔ آئی ایم ایف سخت شرائط تے معاہدہ کیتے۔ ایندے بعد کورونا وائرس دی عالمگیر وبا آئی جیں پوری دنیا دیاں معیشتاں اچ منفی گروتھ تھئی ۔ تنقید میرٹ تے ہووݨی چاہیدی اے ، تنقید اچ آوݨ آلی تجویز کوں اساں میرٹ تے چیک کریسوں۔
